قصة بالدارجة المغربية سامحيني يا بنت الناس

سامحيني يا بنت الناس

القصة لي غدي تشوفو هي قصة من قصص الواقع لي كنعيشوه نخليكم تكتشفوها
جليلة بنت طيبة وذات خلق حسن ونية فعمرها 27 سنة من عائلة ميسورة الحال تتكون من أب '' عبد الله '' و أم '' كريمة '' و أخ كبر من جليلة بثلاث سنوات إسمو '' حكيم '' شرطي ، جليلة حاصلة على شهادة الباكالوريا وكملات قرايتها وسهل عليها الله ولات ممرضة ، وكأي فتاة جليلة كتمنى أنها يجيب ليها الله شي ولد الناس لي يسترها ويكون ونعم الزوج ودير دارها ووليداتها ..
من بعد ماتعرفنا على جليل نتعرفوا على الشاب
منعم شاب 30 سنة ماخدام ماردام طالب معاشو و أخلاقه خبيثة أعوذ بالله معروف فحومتو بدوك الأخلاق السيئة عائلته تتكون من أب '' جيلالي '' و الأم توفات الله يرحمها من بعد مافقسها فحايتها كان هو الوحيد عند وليديه ..
من بعد متعرفنا على الشخصيات .. نبداو القصة ديالنا
واحد المرة كانت العائلة ديال جليلة مجموعة على مائدة الغذاء هي تقول الأم كريمة لإبنتها جليلة :
كريمة : قولي لي أبنتي كتعرفي ياسين ولد عمك لي ففرنسا؟
جليلة : أويلي أماما ضروري وراه ولد عمي هداك
كريمة : إواا راه بغا يتزوج بيك
جليلة تجيفات ( آح آح ) كيفااااش؟؟
كريمة : كيف سمعتي وراه مغديش نلقاو محسن منو
حكيم : الخوادرية أتزوج بشاااخ هههه
جليلة : حكييييييم تزوج نتا بعدا
حكيم : هههه صافي صافي متقلقيش
جليلة : اواا هكااك .. وشكون قاليك باغا نتزوج أماما
كريمة : شوفي أبنتي أنا را مندومش ليك لأنا لا باك وباغا نشوف ولادك قبل مانموت...

يتبع

عبد الله: ماماك عندها الحق جليلة : أماما الأعمار بيد الله وزيدون باقا صغيرة عبد الله : شوفي أبنتي الزواج سترة وخلينا نفرحو بيك ودابا خلينا ناكلو هاد الطجين ومن بعد ونتفاهمو ولد عم جليلة شوية مصرفق عايش فالخارج مكاين ألبنات و التسركيل و البيران بغاو يزوجوه باش يشد الطريق ويحس بالمسؤولية '' من بعد ماتغدااو '' حكيم : أختي جليلة مغاديش تزوج بداك خاينا نهضرو فالواقع هداك خاصو شي مصرفقا فحالو وهاد الموضوع غادي يتسد دابا نيت ومايعاودش يتذكر فهاد الدار عبد الله : الولد عندو الحق السيد حياتو كلها بنات وشراب .. كريمة سدي عليا هاد الموضوع كريمة : صافي صافي بلا غواات جليلة : اوا الحمد لله .. اوا نمشي أنا الخدمة حكيم : يالاه نوصلك جليلة : بلاش أنا نمشي بوحدي '' خرجات شدلت طاكسي من الدار في طريقها الى العمل .. وشافها منعم وصاحبو '' عباس '' خارجا من الطاكسي '' منعم : بشااااخ ع ويلي ويلي ويلي عباس : وايييه آصااط و هواا منعم : السيدة خدامة أصاحبي ممرضة عباس : وباش عرفتيها انت منعم : يا على مكلخ ساهلة .. هازة الطابلية فيديها عباس : واناري أخويا حضاي من الدرجة الأولى ههههه منعم : أخويا زوينة هاد خيتي شبان ليك نطيحها فالشبكة عباس : ياكما فيك السخانة وبطالي شمور بالدارجة وشوف غير لباسك أصاحبي متشوف فيك حتى الشوفة حاجة وحدة لي عندك هي الزين هههه منعم : هادي همزة أصاحبي هانتا قليتها الزين كاين ، اللباس ندبروه و الخدمة نديروها واخا مكايناش هانتا غدي تشوف عباس : كتخلعني أخويا هههه منعم : ههه دوز عندي بلاتي للدار أنبين ليك أنا غدي دابا عباس : صافي مشات '' مشا منعم للدار دوش غسل حالتو ، دبر الحوايج من عند ولد الجيران ولبسهوم .. وصلات لعشية عباس وصل عند منعم '' عباس : منعم واااا منعم منعم : هاهو جاي '' منعم حل الباب '' عباس : كلم ليا أخويا منعم منعم : مالك عور، منعم هادا واش مقرقب هههه عباس : واصاحبي هههههه شهادشي بشااخ موظف نيشاان منعم : ههه من اليوم الموظف منعم .. وديك خيتي أتولي ديالي عباس : نيشان أخويا

منعم تايخطط كيفاش يطيح جليلة فالشبكة ولقا الخطة .. في الغد فالصباح جليلة فطرات وشدات الطريق فاتجاه المستشفى ، ولقات منعم لابس لباس متقولش هادا راه شومور بل موظف و عندو مكانة في المجتمع واقف حدا الباب .. جليلة حادرة راسها وداخلة للمستشفى '' منعم : الأخت ؟؟ جليلة : معايا أخويا ؟ منعم : السلام عليكم بعداا جليلة : وعليكم السلام منعم : بغيتك فجوج كلمات الله يجازيك بخير جليلة : آه واخا ماشي هنا .. فالمكتب ديالي حسن '' دخل منعم للمكتب مع جليلة '' جليلة : تفضل جلس منعم : بارك الله فيك ، الصراحة معرفتش شنو نقول ليك والله جليلة : ياك لاباس ؟؟ منعم : لا والو باس .. خليت خدمتي وجيت لعندك باش نقول ليك بلي راك عجبتيني أبنت الناس جليلة : ههههههه وا زوينة هادي جاي لعندي معا هاد النبوري مع هاد الصباح شنو كتعجبيني ماعرفتيني مخطوبة معرفتيني مزوجة .. خويا راني ماشي من داك النوع ديال البنات لي كتعرف نخرج هنا مع هادا ومع واحد آخر والقهاوي شوف أخويا خليني عليك تابعني خدمتي يمكن ليك تفضل منعم : تقلقتي وانا مزال ماقلت ليك والو جليلة : شنو أتقول ؟؟ منعم : شوفي من هدرتك عرفتك مامزوجاش .. وأنا مابغيتك لا تخرجي معايا ما والو أنا عجبتيني وبغيتك أبنت الناس فالحلال .. راني ماشي من داك النوع لي كتعرفي راني خدام موظف ف البنك وماخسني خير خاسني غير شي بنت الناس لي تفهمني جليلة : '' وهي حشمانة وكضحك ضحكة بريئة '' شتي شنو يجيك مليح تابعاني الخدمة مع ديك 12:30 تسناني فهاد القهوة لي شادا على المستشفى وماغادي نمشي معاك لحتى بلاصة عجبك الحال مرحبا مابغيتيش الله يعاونك أخويا منعم : صافي موافق الله يعاونك على خدمتك جليلة : آمين شكراا بسلامة '' خرج منعم من المستشفى ودار ضحكة شريرة وتيقن بلي 25% من الخطة ديالو تحققات ''

وصلات الوقيتة وتلاقاو وبداو الموضوع '' منعم : كيف داز صباحك ؟ جليلة : الحمد لله بخير '' كل واحد بدا يعرف راسو على الآخر .. وبطيبعة الحال كاع داكشي لي قال منعم كلو كذوب وهي على نيتها مسكينة دايرة فيه الثقة ويتقات كل كلمة قالها ورتاحت وقالت ربي جاب لي ولد الناس أخيراا .. وما خفي كان أعظم .. بقاو كيتلاقاو أسابيع وجليلة عايشة فكذوب منعم اولات مكتخيلش النهار واحد مايتلاقاوش فيه .. وصاحبنا منعم كالس كيسلف فالحوايج كالعادة ويصاوب فهدرتو الحلوة لي فتنات جليلة.. وتيقن بلي الخطة وصلات للنصف ولما لا بل قربات تكمل وهوما جالسين فالقهوة قالت جليلة '' جليلة : منعم خاصك تجي تهدر معا مالين الدار ف موضوع الزواج شغايقولو علينا الناس الا شافونا ولا شافني شي صاحب خويا مشاكيل أيبداو منعم : '' بدا يصفار ويحمار '' وحبيبة بغيتك تجي تشوفي الواليدة رااه كتسناك غير فوقاش أتجي وتشوفيها وفرحات بلي أنتزوج أخيراا جليلة : ولكن .... منعم : مكاين بو ولكن عفاك لبي ليا هاد الطلب والله حتى غدي تفرح جليلة : مممم صافي واخا منعم : يخليك ليا غدا مور الظهر أندوز عندك ونديك جليلة : صافي ان شاء الله '' وهنا جليلة أتمشي لجهنم برجليها .. '' '' في الغد في الصباح فاقت جليلة وحسات بشي حاجة فخاطرها ماشي هي هاديك '' جليلة : ياربي شهادشي .. الله يكتب مكاتيب الخير كريمة : جليلة أجي أبنتي تفطري جليلة : واخا أماما أنا جايا '' فطرات جليلة ولبسات حوايجها .. وشدات طريقها للمستشفى '' '' وخونا ابليس بغيت نقصد منعم كيتسنى الخطة تكمل اليوم نخليكوم تكتشفو شنو غدي يطراا .. '' '' منعم و عباس كالسين فالدرب كالعادة '' منعم : عباس كتعرف الدار ديال با التهامي الله يرحمو ؟ عباس : واش انت مريض ورا كنت كنتسخر ليه مسكين وكيتهلا فيا اييه شكون ينسا داك السيد منعم : ديك الدار سنين مجا ليها شي حد ياك ؟؟ عباس : ورا معندو حد داك السيد راه قالي ولادي رماوني هنا الله يخلصهم وخلا ليا مسكين الساروت ديال الدار كنبات فيها مرة مرة منعم : عباس سيييير أخويا الله يزوجك هادا على من كنقلب عباس : لقينا حتى الخدمة أصاحبي هههه ولكن شنو هو هادشي ؟ منعم : الساروت ألكالاخ هههه الا عندك دابا أراه ليا عباس : هاهو .. ياكما باغي الدير شي قصارة بلا بيا هههه منعم : دابا يوصلك الخبار عباس : صافي عنداك تلف السوارت راه الدار ناضيا مفرشة يا سلام منعم : صافي العز أخويا أنا مشيت دابا تهلا عباس : تهلا أخويا '' منعم داكشي لي مخطط ليه راه غادي مزيان .. وصلات الوقيتة لي دار معا جليلة وتسناها حدا المستشفى و داها لعند الأم ديالو كيف دايرا فبالها جليلة ''

وصلات جليلة ومنعم للبلاصة المعلومة '' جليلة : منعم ماماك ساكنة هنا فهاد الدار حشومة عليك تخليها هنا و القنط و تا حد مكاين هنا منعم : هانتي كاتشوفي عييت معاها البرطمة موجودة تسكن معايا فيها مابغاتش '' وصلو للدار '' منعم : زيدي دخلي عند عجوزتك ههههه (سد الباب بالساروت ) جليلة : علاش سديتي الباب بالساروت منعم : هههههه واا مكلخة انت مكاين لا الواليدة لا الواليد بصيغة واحدة أخرى غيير أنا وياك وبوحدنا وتا واحد مغايصدعنا جليلة : منعم حل الباب خليني نمشي بعد مني عفااك منعم : هههههههه واش صحابك دخول الحمام بحال خروجو ههههه ناخد داكشي لي بغيت و الله يعاونك خخخخخخ جليلة : الله يرحم ليك الوالدين (وهي كتبكي) خليني نمشي الله يخلي ليك ميمتك عفاك أخويا نبوس ليك رجليك خليني نمشي دير ختك بلاصتي عفاك أخويا لفلوس لي بغيتي نعطيهم ليك غي خليني نمشي الله يرحم ليك الوالدين منعم : مسكينة بقيتي فيا .. هههه معنديش ختي غير تهناي '' مشات جليلة كتجري الباب كضرب فالباب ولا من مجيب .. شدها من الشعر .. صرفقها ، غيبات ، وبعد ما فاقت كانت الصدمة والفاجعة و الموصيبة ، الشرف ديال جليلة مشا ضاع كلشي وبهول الصدمة بقات كتبكي وكضحك '' جليلة : لا لا ميمكنش كنحلم فيقي أجليلة واش حماقيتي منعم راه ولد الناس فيقي فيقي فيييييييييييقيييييييييي أجليلة علاااااااااااش أربي علااااااااش أربي علاااش أربي '' وغرقات فدموعها '' '' منعم مشا كيجري هربان وخلا جليلة فديك الدار .. وشافو عباس ومشا كيجري عندو '' عباس : مااااااالك أصاحبي ؟؟؟؟؟؟؟؟ منعم : عباس الواليد أمانة عندك '' ومشا كيجري '' عباس : مال هاد خينا هادا شدار '' مشا كيجري للدار ديال با التهامي '' '' وماهي الا دقائق و وصل للدار وكانت الصدمة شاف ديك الممرضة شدار فيها منعم ولي مابقا ليها والو وتحماق '' عباس : علاش أخووياا منعم شدااني نعطيك الساروت علاااااااش أخووويا و كون كانت ختك واش تبغيها ليها واا ربي شغندير دابا '' صونا على البوليس وعطاهوم العنوان وقاليهم البنت ها شنو وها شنو وبطبيعة الحال ماباعش صاحبو .. من بعد ماسالا هرس كارط سيم ديالو (النمرة) وهرب ''

وصلو البوليس ومعاهم الإسعاف .. وداوها أولا للمستشفى .. وبقاو البوليس فديك الدار ربما يلقاو شي حاجة على لي دار هادشي .. مالقاو والو فالدار .. ومن بعد ما تهدنات شوية جليلة بقاو كيسولوها على شكون لي دار فيك هادشي .. كاتجاوبهوم '' جليلة : تقت فيه .. صحابني راجل .. تقت فيه .. صحابني ولد الناس البوليس : عاونينا باش نلقاوه الله يخليك '' عطاتهوم جليلة جميع التفاصيل .. ومشاو على وجه السرعة باش يقلبو عليه ساعة كاع داكشي لي قالت مكاين منو والو كدب عليها فكولشي مشاو البنك والو مكايناش هاد السمية كاع .. حتى من الدار ديال با التهامي كاينة فالخلاء الناس عارفين بلي داك السيد هو لي ساكن تما وتا حد من غيرو .. صاقت العائلة الخبار كولشي تصدم كلشي أيحماق مشاو عندها للمستشفى '' كريمة : الله أبنتي الله .. الله أبنتي الله شبابك أبنتي مشا الله يا ربي صافي .. ضحكو علييك الذئاب أبنتي '' جليلة غيير كتبكي '' .. '' الاب كيبكي كيف الدري الصغير على بنتو جليلة و حكيم خوها غيير ساكت ومصدوم .. كيهدر معا البوليس وعطاوه كاع المعلومات ولكن بدون جدوى وكلو الاأمر لله ولكن التحقيق بقى مفتوح .. ومن بعد 15 يوم مات الأب ديال جليلة من بعد الفقصة .. وزادت تعدبات العائلة بسباب هادشي وزادت تعدبات جليلة وحملات راسها المسؤولية فموت باباها .. يعني العائلة تفرتكات .. دازو سنين على هادشي ولا خبار لا والو بقاو على هاد الحال .. بلا شك بغيتو تعرفو شنو طراا لمنعم .. هادشي لي غنعرفوا فالجزء الموالي ''

منعم من بعد مهرب من ديك لمدينة نسا كلشي بحالا مادار والو الواليد ديالو وصلو خبارو بلي توفا وهانية عندو .. منعم خدم فالبني ومنها نيت فالليل كيكون عساس على السلعة ومعا هو كان حرايفي فهادشي فكون كان شومور كان مرة مرة كايخدم فالبني الطاشرون ''مصطفى'' عجبو '' مصطفى : خدمتك زوينة .. فين تعلمتي هادشي ؟؟ منعم : الله يفحفظك .. وغير معا لعشران ويامات التشومير ههههه مصطفى : هههه شتي انت أتوصل بعيد ويلا بقيتي معايا أتوصل منعم : الله يحفظك .. وهاانا معاك '' منعم بقا معا داك الطاشرون حتى وصل لقمة الاحترافية ومعا المدة ولا هو الطاشرون والملاين كيدوزو على يديه .. ومن بعد ماوصل لهاد المرحلة قرر يتزوج .. وهادشي لي كان تزوج ودار عراسية يا سلام فرحان وعايش الحياة وجليلة باقا كتعدب مسكينة .. ومن بعد الزواج رزقو الله ببنت '' منعم : ويلي ويلي بنتي ... هههه نعيمة (زوجة منعم) : هههه الزين تيولد الزين هههه '' و ديك البنت ماهي إلا عقاب من الله عز وجل عطاها ليه الله باش يدوق العذاب لي داز على الاب ديال جليلة .. كبراات قدام عينيه دخلها لأحسن مدرسة .. بنتو كبعض الفتيات مكاين غير الدراري والخروج من قهوة لقهوة ودوز من هادا لهادا .. حتى شاء الله وطراا كييف طراا لجليلة ، سبحان الله .. دري من دوك الدراري لي كتعرف بنتو بقا عليها بالحيلة حتى داها لواحد الدار بحجة العائلة باغا تشوفك .. السيناريو ديال جليلة تعاود معا بنتو .. وشرف بنتو مشا كيف مشا شرف جليلة .. ونزل الخبر كالصاعقة وأول حاجة قالها ''

منعم : هادا عقابي من الله نستاهل نستاااااااااااااهل نعيمة : واهيا داك الراجل أش درتي أولد الحراام '' عاود ليها كلشي '' منعم : سمحييييلي أبنت الناس سمحيييلييييي -وبقا تيبكي- نعيمة : دابا غدي طلقني دابا نيت والله منعيش معاك ثانية تريكت لوسخ وابنتي والله لا كلسات معاك '' المشاكيل نزلو عليه فدقة وحدا '' شرف بنتو .. الطلاق .. وحياة من هنا القدام فيها غيير المشاكيل ودخل الحبس من بعد ماسلم راسو البوليس وعرف الدنب لي دار خاسو يتعاقب من بعد هاد السنين وهو هارب .. وجليلة لي مشا ليها شرفها سهل عليها الله وتزوجات مع واحد ولد الناس نساها مدااز عليها واخا عارف قصتها حيت بصح كاينين ولاد الناس كيف كانين ولاد الحرام '' هادي هي القصة لي بغيت نشاركها معاكوم بغيت نقول في الختام : '' واش صحابكوم الله سبحانه وتعالى مكايشوفش راكوم غالطين .. ان الله يمهل ولا يهمل ، بنت بريئة فحال جليلة شنو ذنبها حتى تدي ليها انت شرفها حط ختك فداك الموقف .. مكايناش اختك كاينة بنتك راه باقي اتزوج وغادي تعاقب ف الدنيا وكيتسناك عقاب عاوتاني فالآخرة متنساش أخويا الله يجازيك بخير .. وميساج البنات كذلك وفيقو شوية من الGلبة راكم فالدنيا ماشي جنة و الله يبعد عليكم ذئاب كيف هادو شدو فالله عز وجل ومغاديش تخيبي الدنب لي دارت جليلة تاقت فيه .. راه لي باغيك أيجي لدار بابك نيشان أختي مكاين لاخرجي معايا لا والو والخطوبة لي كيديرو الناس هيا فاش كيتعرفو الكوبل بيناتهوم ماشي القهاوي و الدوران والله يهدي لجميع هادا مكان نتمنى تكون عجباتكوم القصة هدفي أن هي العبرة تاخدوها والسلام عليكم

النهاية