قصة بالدارجة المغربية "ذاكرة عاشق"

اسمي ريحانة في عمري 25 من طبيعتي كنحب نساعد الناس و نفرحهم داكشي علاش قررت من بعد الباك نقرا التمريض .. من بعد التخرج دوزت اياام و شهور غير في التقلاب على خدمة هلي يقول ليك تبقاي معانا ستاج 3 شهر و من بعد 3 شهر يقول ليك بسلامة صبرت و دازت عليا تا في الاخير خدمت في مصحة خاصة لمرضى القلب و الشراين بتمن قليل و لكن قلت معليش حسن من والو .. كنت كنشوف بزاف الممرضات لقدام تما و المسيطرات على المصحة كيف كيقدرو يخدو كتر من خلصتهم غير رشوة .. هذشي لي معمري قدرت نديرو انا حيت تربيت على الدين في دارنا و تعلمت ندير خدمتي بلا منتسنا شي حد يخلصني اصلا هدفي الاول نعاون الناس لرواحهم ما بين الموت و الحيا ..
بديت كنولف حياة الممرضات و جوهم من بعد مدوزت عامين معاهم وليت كنحس المصحة داري و المرضى ولادي و انا مسؤولة عليهم ..
نهار الخميس .. عمري نسى ذاك النهار فاش جا وحد الولد كيحمق بالزين لكن داك النهار كان وجهو صفر وشاحب و عينيه دابلين و دموعو نازلين على خدو من كترت الالم لي فيه و هو شاد في قلبو

لي فهمت من الطبيب بيلا ‫#‏عمر وقع ليه انسداد في واحد الشريان يعني مبقاش كيوصل ليه الاكسجين لقلب و هذا ممكن يتسبب في جلطة قلبية لوكان تعطلب بي 5 دقيق لحمدلله عتقوه لكن عمر كان عندو هذا المشكل من ضعرو وقع ليه هكا بزاف و كل مرة كيعتقوه في اخر لحضة فالعشية وقبل منخرج ضروري كندير دورة على المرضى لي في سيرفيس ديالي .. دخلت لوحد الغرفة لقيت عمر ناعس و مو حداه كتقرا عليه القران و دموعها في عينيها .. الحاجة راه سالا وقت زيارة خصك تخرجي وخا ابنيتي انا نيضة ... قربت لعمر وهو ناااعس كيف لوليد صغير .. الالام الكبير لي حس بيه اليوم خلاه ينعس بكري و بلا ميحس .. كملت دورتي و بدلت حويجي و خرجت .. وقفت في البلاكة كنتسنا طوبيس ولقيت أم عمر تا هيا وقفا كتسنا الطوبيس .. قربت منى وقالت لي : نتي الممرضة لي كنتي لذاخل دابا اه انا ... عافاك ابنتي نوصيك على ولدي عمر .. راه معندي من غيرو قابليه مزيان ابنيتي .. كوني هانية اخالتي جا طوبيس وركبنا بجوج فيه و جلسنا داوين .. وتما عرفت قصة عمر كاملة عمر مني كان صغير وهو مريض بالقلب لكن كان عادي حتا دخل الكلية و بسبب بعد المشاكل الاسرية بدات كتزاد حدة المرض ديالو و تما جاتو أول أزمة قلبية داوه لسبيطار تما قال ليهم الدكتور بلا وصل لمرحلة خطيرة في المرض و أن تهاونهم هو سباب في هدشي من بعد ذاك النهار عمر كترو نوبات القلبية لي كتجيه و كل مرة كانو كيعتقوه في اخر لحضة لدرجة تخلا على قرايتو و بعد على أي تعب و أي شي ممكن يعصبو و لا يجهد فيه نفسو كان كل مرة كينصحهم الطبيب باش يديرو اخر الحلول لي هو زرع قلب جديد قبل ميفوت الفوت .. عائلة عمر تردو بزاف في هد القضية الان نسبة النجاح كانت قليلة ... لمدة اربع سنين وقع لعمر اكتر من 5 ازمات القلبية .. و الاخير كانت اصعب .. أم عمر كانت كتعاودلي و تبكي - لعملية صعيبة ابنتي و نسبة نجاحها قليلة و تا الا بقا هكا ممكن يموت في اي لحضة مبقينا عارفين منديرو 4 سنين هدي و انا نخدمة ليل و نهار انا و باه غا باش نقدرو نجمعو تمن العملية بش الا ضطرينا يكونو الفلوس مجودين و ليوم اكد علينا الطبيب باش نديرو لو العملية والا غادي نفقدوه في اي لحضة .. لفلوس جمعناهم لكن ابنتي ملقيناش المتبرع .. اشمن حالة هدي لي تشوفي فيها ولدك كيموت قدام عينيك و نتي مقدراة ديري والو . معرفت كيفاش نوسيها من غير اني نقول ليها هذا ابتلاء و غدي يفوت ان شاء الله مشيت لدارنا داك الليل مجانيش النعاس و انا كنفكر في عمر داك الولد النقي و الزوين كيف هو دابا مابين الحياة والموت والله ما يستاهلش صباح مشيت للمصحة و طلعت ندير جولتي الصباحية على المرضى كيف العادة . وصلت لغرفة عمر ملقيتوش في بلاصتو تخلعت .. شوية سمعت صوتو كيرد في الحمام دقيت علي .. وش نقدر النعاونك .. خرج وهو هاز راسو لسما لا انا بيخير شكرا - من طبعو كيكره الشفقة و مكيرداش يبين راه محتاج لشي حد ... وصلتو لبلاصتو حطيت ليه فطورو خرجت فالعشية بدلت حويجي و انا خارجة شفت عمر مع الولدا ديالو في جريدة لي في وسط المصحة قربت باش نسلم على مو .. و قالت لعمر هذي ممرضة الله يعمرها دار اوليدي .. هز راسو فيا و بتسم ببتسامة دات لي العقل و حدر عينيه شفت في مو و قلت ليها : خالتي اي وقت حتجيتيني انا موجودة جريتها على عمر و عطيتها نمرة تلفوني و قلت ليها تصلي بيا في اي وقت و خديت نمرتها على اساس نسول في عمر كيف بقا و مشيت .. داك النهار كان عمر غدي يخرج من المصحة و غدي يبقا يرجع مرة في السيمانة يشوفو الطبيب دوزت ديك السيمانة وعمر مبغاش يحيد لي من بالي - كان كبر مني بي 8 أشهر فقط لكن المرض كان مخليه يبان كبر من عمرو بترهلات لي تحت عينيه و شحوب لي في وجهو و لكن حروف زين مزال فيه تلقيت عمر صدفة داك النهار و انا خارجة كان جا يشوف الطبيب ديالو و لقاه كونجي سلمت عليه و سولتو على احوالو .. كان عيان داك النهار و كيتمشا بزز و مو مجاتش معاه لضروف عملها قترحت عليه بش نمشي معاه تا يخد طاكسي كنت خيفاه يطيح في طريق .. تمشينا توصلنا الشارع وحنا كندويو مسخيناش نحبسو الهدرة قالي عمر باش نكملو مشي حيت شحال متمشا كان بي الفرحة عليا يطلب مني نبقا معاه .. تمشينا و كان لجو زوين و شتا خفيفة .. دخلنا الكافي و شربنا قهيوة و تنقشنا في بزاف الموضيع .. كان دري واعي بزاف و حضاري في نقشاتو .. قلت ليه بلا خصني نمشي حيت منقدرش نتعطل بزاف .. شكرني على الوقيت لي عطيتو و خد نمرتي وتفرقنا و يريت متفرقنا كان مزال الحال أ عمر

من ذاك النهار تبدلت حياتي الغد تاصلت بي أم عمر و قالت لي بلا عمر محتاج يخد شي إبر و لكن البنت لي كنت كتدقهم ليه تحولو من حداهم و سولتني وش ممكن تعودي تجي تدقيهم ليه في دار 2 مرات في سيمانة صافي .. طبعا قبلت و مشيت كان فرحان فاش شافني وقالي بقاي تعشاي معانا عتدرت منو لاني منقدرش نتعطل على دار .. ولكن درنا موعد نخرجو الغد على أساس نمشي معاه يخد شي حويج من القيسارية .. الان عمر معندوش اصدقاء كتار صديق واحد يوسف لكن اغلبية مشغول بالخدمة ذالك النهار كنت خدامة الصباح و خرجت مع 2 لقيت عمر كيتسناني من بعد متغدينا مشينا القيسارية و تقدا كاع لي خاصو دوزنا عشية زوينة قالي عمر بلا قليل فاش كيخرج من الدار حيت مكيلقاش لي يونسو و أكدت عليه بش وقتما حتاج يخرج يتصل بيا فجأة وليت كنحس راسي مضطرة نكون مع عمر و نخرجو من حالة الاكتأب لي عيش فيها معرفتش وش شفقا و لا أش .. معرفتش .. لمهم كترت الخرجات معاه تقريبا يوميا من غير الهدرة في الفيس و تلفون , وحد النهار تصلت بي أم عمر شكراتني و قالت لي بلا عمر تبدل بزاف من دخلتي لحياتو وبلا اخير ترسمات الفرحة على وجهو شحال مشافتو هكا .. بختصار عمر ولا عندو أمل في الحياة من بعد مكان فاقد الامل وفصراحة انا لتعلقت بيه كتر .. كان كيصحبلي كنشفق على حالتو صدقت انا لي كنحتاج الشفقة من بعد ما وليت كنبغيه... كيفاش منبغيهش ولد من اضرف خلق الله و لي كان كيحمقني فيه مكناش كنختالفو في تاشي موضوع نفس الأفكار و نفس الاراء.. كان نصفي تاني تماما.. عمري شفت منو العيب.. دازت كتر من 5 شهر و عمر خدا جزء كبير من حياتي يمكن كاع حياتي كلها ... و تا عمر هكا حسيت بيه وخا مدواش و مقال والو عارفاه ولد حشومي .. وحد النهار تصل بيا و قال ليا بغا يشوفني ضروري .. كنت في دار كنصبن جمعت تصبين دغيا و خرجت نجري منقدرش نتعطل عليه تلقينا في الكافي لي مولفين نكلسو فيها على البحر .. لقيتو كالس و ساهي في جيهت البحر او وجهو مرسوما عليه هموم الدنيا كاملة ..

كلست و قلت السلام شاف فيا شوفا طويلة و مدواش .. عمر مالك خلعتيني ؟ .. جاوب و هو كيشوف في البحر : لقينا متبرع مزياان هدشي كيفرح مالك مقلق ؟ .... ريحانة انا خايف ... مناش خايف بلعكس غادي دير العملية و تنجح و ترتاح من كلشي و تعيش حياتك كيف كتمنى راك غير كيبان ليك أ ريحانة راه نسبة النجاح قليلة .. يتنجح ينموت ... - الله ينجيك لا لا متقولش هكاك اكيد غدي تنجح .. دكتور بن جلون دكتور تبارك الله عليه متمكن هو و طاقم الاطباء لي معاه ان شاء الله ما يكون غا الخير .. أهم حاجة تكون نفسيتك مرتاحة و خليك متفائل خير ... حطيت ايدي على يدو وقلت عمر مكينش حل اخر .. هذا هو الخيار الوحيد عمر حدر راسو وتنهد تنهيدة خرجات من قلبو الضعيف وقال : توكلنا علي الله و لا حول ولا قوة الا بالله -في العشية مشيت نجري للمصحة كان خاص للعملية دار في نفس اليوم لي خداو فيه القلب من السيد لي تبرع بي اعضاء بعد الموت .. فعلا نعم الرجل لي يقدر يحي شحال من انسان محتاج اعضاء للزرع منهم كان عمر لي كتر من 4 سنين و هو كيقلب علي متبرع .. دخلت عند طبيب بن جلون و سولت دكتور عفاك قول ليا بي صراحة شحال نسبة النجاح ؟ .. ريحانة الا كان على العملية راه غدي تنجح و لكن الصعيب هو جسمو وش يتقبل القلب الجديد أو لا .. هنا فين كين الصعوبة لأن اغلبية الجسم كيرفض العضو الدخيل .. جوبتو وعيني غدي يخرجو من بلاصتهم يعني ؟؟ قال : يعني ممكن يموت

تجمدت في بلاصتي و تزيزنت ... قرب مني دكتور وقال : ريحانة معليك غا دعي معاه .. يلاه وجدي راسك غدي نبداو العملية من هنا ساعة و غدي تكوني معانا ركابيا فشلو وانا كنوجد في غرفة العمليات لي فيها غدي يحيدو قلب حبيبي .. مبقيتش قادا عيطت على ممرضة اخرا باش تكمل التوجاد و مشيت نشوف عمر لي كان كيتسنى يوصل وقت العملية كان عمر مستسلم تماما ومسلم امرو لله حداه امو وهي تتقرا القران و حاطا ايدها عليه دخلت و انا ديرية بتسامة كبيرة مخبيا فيها كاع لي ممكن يخلع عمر و مو و باه و يوسف صحبو لي كان وقف بعيد و سارح بأفكارو .. وقف عمر و قال لمو انا غدي نخرج مع ريحانة نشم لهو على برا و نجي .. خرجنا لجريدا لي على برا شاف فيا عمر لاول مرة كنحس بالخوف وانا معاه يمكن خفت تكون هذي اخر مرة نكون معاه يمكن خفت تكون اخر نضرة يتلاقاو فيها عينينا شد في ايدي لي كانت كترعد وقال ليا ريحانة من نهار عرفتك تبدلات حياتي .. حياتي لي كانت كلها مرض دواء ملل و وحدة كنت وحيد بزاف ا ريحانة قبل من عرفك ريحانة عطيتني أمل في الحياة و خلقتي السعادة في حياتي و يمكن في أيامي لاخيرة خديتي من وقتك و عطتيني خلتي حياتك و دخلتي حياتي ... تبنجت انا تماما و انا كنقول في خاطري # عاد دويتي اعمر و لاش في هذا الوقت بالضبط # .. وكون غا مدويتيش ا عمر .. و في الاخير قال ريحانة لاول مرة كينفعني قلبي في شي حاجة زوينة اول مرة كيتحرك قلبي ريحانة ‫#‏انا كنبغيك محسيتش تنزلو دموعي ومقدرتش نهز راسي فيه مقدرتش نشوف فيه ولا نجاوب و نقول ليه تا انا كنبغيك تانا تبدلات حياتي مني دخلتي ليها تأنا كنت وحيدة قبل منعرفك و نت نصفي تاني لكنت كنقلب عليه مقلت والو لساني تجمد و مقدرتش نطق وقف عمر و مشا و أنا حادرة راسي و دموعي مبغاوش يتحبسو .. مسحت دموعي و شفت في المكانة .. قرب و قت العملية .. عملية على قلب عمر و حتا قلبي .. من بعد متوادع مع مو و باه دخل عمر لقاعة العمليات على رجليه هاز راسو لفوق ولكن قلبي انا و عنيا كانو طيحين للارض مقدراش نشوف في عينيه و لا قادرة نوقف .. من بعد مبنجوه شديت لعمر في ايدو و بقيت كنشوف فيه حتى غيب و بدات العملية من بعد ساعتين و حنا وسط العملية و انا كنقاوم راسي باش نقدر نكمل جبد الطبيب قلب عمر المريض لي غدي يبدلو بقلب المتبرع مدو ليا و هزيتو بي ايدي مشي أول مرة كنحضر للعملية زرع القلب و مشي أول مرة كنهز قلب لكن هذا المرة كان الامر مختالف هزيت القلب لي حمل حب كبير ليا هزيت القلب الطيب لي خلاني نبغي عمر هزيت قلب لي فيه قلبي كيموت .. في ديك اللحضة و انا كنشوف فيه وليت كنشوف الضبابة تطحت و غيبت محسيت بي والو تا حليت عينيا و لقيت أم عمر حدايا و عينيها فيهم الدموع .. بلا منحس غوت خالتي فين عمر قالت غير رتاحي عمر مزال مسالاو العملية مالك ابنتي خلعتيني عليك محيلتي لعمر محلتي ليك قالت ليا بلي ساعتين و انا مغيب أطول مدة غيبت فيها في حياتي ..سولتني : 4 سويع و مزال مسالت العملية ابنتي قولي ليا أش كين وعلاش سخفتي .. مكين والو اخالتي راه طبيعي العملية تخد هذا الوقت

من بعد ساعة خرجات الممرضة هند صديقتي كتجري وقفتها وسولتها قالت بلا الوضع خطير دعيو معاه .. مفهمتش أش وقع و أم عمر كانت غادا تسطى من الخلعة .... بغيت ندخل لغرفة العمليات حبسوني وبقينا جلسين على اعصابنا كندعيو و نطلبو ربي يحفظو من بعد ساعة ونص اخرى سالات العملية و خرجو عمر من غرفة العمليات للانعاش و قالو الاطباء بلا مميمكنش يعرفو شي حاجة دابا خاص تيفيق و يشوفو واش الجسم تقبل القلب الجديد أو لا وهذي أصعب مرحلة . .. سولت طبيب على اش وقع وسط العملية قالي بلا وسط العملية وقعات مضاعافات ودازت مدة متضخش ليه الدم للمخ الشي اللي خلا واحد الجزء من المخ يتلف تما فهمت شي حاجة لكن تمنيت نكون غالطة دوزت ديك الليلة في المصحة أنا و أم عمر عن راسو نصليو و ندعيو معاه مشفناش النعاس لليل كامل .. وصل الصباح و بدا عمر كيحل عينيه و كيشوف فينا بحالا مصدوم فرحات مو و طارت عندو : عمر ولدي كيف كتحس ؟ عمر مكيجاوبش غير كيشوف دور وجهو و شاف فيا عيني في عنيه و سرحت و أنا كنفكر مزال حاس بي شي حاجة من جهتي و لا حبك لي بقا في القلب الاخر و هذا قلب خاوي ؟ مشي مهم هذشي كامل المهم تكون بخير و يوافقك القلب .. حيت تال دابا مزال ممعروفش واش تقبل الجسم القلب شكون نتي ... هذي أول كلمة قال عمر لمو من بعد العملية ... بقات امو مصدومة مفهمت والو ولكن انا فهمت كان توقعي في محالو للاسف .. الجزء لي تلف من المخ هو المسؤول على ذاكرة .. قربت وبي بتسامة قلت ليه على سلامتك .. قال شكون نتي و أنا اش كندير هنا .. مو بقات مصدومة و مدواتش .. قلت ليه نتا اسمك عمر و درتي عملية زرع قلب و الحمدلله نجحات على سلامتك .. قال وشكون نتوما قلت ليه هدي ماماك و وانا ..... - اش غدي نقول ليه شكون انا - انا الممرضة ديالك حدرت راسي و خرجت وقفت في لكوار وجلست نبكي كنبكي من فرحتي حيت العملية نجحات و كنبكي حيت عمر نسى كليشي ومعندي كيفاش نشرح ليه ولا كيفاش نقوليه كنت كتبغيني و كنت كنبغيك و لي بينا مكانش عادي ... مشيت لدارنا من بعد ما اكد ليا الطبيب بلا عمر حالتو مستقرة و تقريبا العملية نجحت بدلت حويجي و نعست كنت يومين منعست حسيت بالراحة و الاطمئنان على عمر اهم حاجة انهو بخير و الا كان هو نسانى انا منسيتوش ومغديش نستسلم هو دار لي عليه و قاوم ورجع الحياة و انا غدي نقاوم تنرجع حبي لحياة هكذا قلت و بتسمت و نعست رجعت اليوم لي بعدو درت دورة على المرضى كيف عادتي وصلت لغرفة عمر خديت نفس كبير و دخلت لقيت امو وخدا البوم صور و تعرفو على العائلة نطقات مو من بعد مشيرات بي ايدها فيا وهذي اعمر ريحانة ل.. حبستها بش متكملش حطيت ادي على كتفها و قلت انا ريحانة الممرضة ديالك كبقيتي؟ مجوبش وزدت قلت تبارك الله راك اليوم بخير الا بغيتي نخرجوك لجريدة تشم الهوا الجو زوين ليوم كان عمر اغلب الوقت ساكت.. طبيعي على لي وقع ليه اصلا هو من طبعو سكوتي و هدشي لي كيعجبني فيه.. قالت ليهم الا حتجتو شي حاجة عيطو ليا و الا حتجتي تخرج تبدل الجو انا مجودا.. و خرجت و انا كنقول في راسي لي خلا قلبك يتحرك ديك المرة غدي يخليه يتحرك تاني بقا عمر 15 يوم في المصحة كنت كافية نكون افضلا مؤنس ليه كيما و لا كيقول ليا نتي اقرب حد ليا من بعد الولدة نهار خرج عمر طلب من مو تعرد عليا لغدا معاهم نهار السبت جاي جا عندي و قالي ها نمرتي باش الا كنتي جيا ندوز ليك الولدة تنعت ليك الدار جاتني الضحكة... دار راني حافضها بحال دارنا قلت ليه وخا كون هاني ضروري نتصل بيك و لا بي ماماك جيت لدارهم و كان عمر فرحان و جبد ليا تصاور و راني صور وهو صغير و كانت صورة منهم خديتها ليه فاش كنا في جنب البحر قبل شهر من العملية .. قالي زوينة هذا البلاصة كنحس راسي عقل شويا عليها.. قالت ليه تبغي نديك ليها قال غادي نكون فرحان الا بغيتي مدازش شهر صح تبارك الله و ولا حسن من الاول و شد محال باه ديال توب و لا هو مقابلو و خرج من الملل لي كين عيشو كانو بزاف المرات كيتصلو بيا نجي عندهم تال وحد النهار كنت وقفا مع امو في الكوزينة و هيا تقول ليا بنتي تكرفصتي معانا بزاف لا اخالتي متقوليش هكاك... قاطعاتني سمعي ابنتي عمر دوا معايا بش نقول ليك شي هدرة حيت هو مقدرش ' خافك متبغيش.. عمر طالبك لزواج.. تصدمت حشمت و كنت غادي نطير فرحة مدويتش قالت عمر ميلقاش محسن منك ابنتي و انا مغدي نطمئن على ولدي غير معاك مني قالها ليا فرحت حيت تا انا كنت بغا نقترح عليه هدا القضية غير قالت بلاتي شوي و لكن الحمدلله عمر كان عندو نفس الفكرة

اش قلتي ابنتي في خاطري قلت (اويلي اش عندي منقول مكنتمناش شي حاجة من دنيا كتر من هكا) حدرت راسي و قلت يكون خير.. قالت لي يعني موافقة.. هزيت راسي وطارت الحشمة مغديش نلقا حسن من عمر اخالتي شرف ليا باش تختارني لولدك قالت لي نقولها لدارنا مشيت طيرة لدار داك النهار و قلتها ليهم و تاصل اب عمر بي بابا و تفقو على نهار السبت اجاي جاو محملين بالطيافر و السكار و عمر هاز الورد كان احسن نهار في حياتي عمر كان كيحمق بالكوستيم تفقو مع بابا على صداق على موعد العقد و العرس من بعد 3 شهر على ميجمع راسو مبغيتيش العرس قلت ليهم نديرو غا حفلة صغيرة نذير فيها الحنة و تصيورات و فلوس العرس سفرنا بيه لشمال و دوزنا احسن ايام حياتنا سكنت في العام لول مع دارهم كانو كيعاملوني بحال بنتهم الحمد لله و من بعد تيسرت الامور و فتح عمر محال جديد في منطقة بعيدة على دارهم و كان من ضروري نتحولو كرينا قريب لمحال عمر مبقا عندو تخطر على صحتو و رجعت ليه ذاكرتو من بعد عام من العملية و بتدريج .. تزادت عدنا وليد كيشبه لباباه بزاف ودابا انا حاملة في شهري 4 الحمدلله و لفرحة لي في حياتي مكتوصفش 

النهاية